Advent, Advent ...

... ein Lichtlein brennt ...

Et es ald widder su wigg!

Noch e paar Woche, dann es et Johr 2023 eröm. Mer maachen all e klein Püüsje, för an all die Lück zo denke, die mer gään han, die mer vermesse, ov die mer ald lang nit mih gesinn han. Loot uns fruh sin, dat mer gesund sin und loot uns mem Hätze bei denne Lück sin, denne et nit esu god geiht. 
Dis Johr han mer uns jet ganz besonders enfalle looße: Mer han e paar Musiker un Bands gefrog, ov se uns nit e paar Gedeechte ov Leeder enspreche welle. Un ne Püngel vun denne han metgemaht. Loot üch üvverrasche, all die dobei sin, sin bekannt wie ene bunte Hungk!

Ävver mer han noch en andere Idee gehatt: Mer han uns Seminardeilnemmer gebedde, ov se nit versöke welle, em Seminar e Adventsgedeech selver zo schrieve un enzospreche. Un och do han sich e paar Lück gemeldt un sin ärch kreativ gewoode. 
Et es äch doll zo sin, wat en de Seminare alles geliert weed. Wä selvs eimol su en Seminar besöke well, de Aanmeldunge för et nöchste Johr laufe - luurt ens noh unger "aktuelle Kurse".

Dat all mööchte mer Üch em Advenskalender präsenteere. Loot Üch üvverrasche - hinger welchem Dürche se ligge – dat weed nit verrode.