20. Määz 2023

Et Fröhjohr es do!

Hügg beginnt der Fröhling. Un och diss Johr wolle mer dat e bessche fiere un uns drop freue. Ab beste geiht dat met enem klein Gedeech: Diss Johr vum Margareta Schumacher

Määz
(Aus: Kölle läv et janze Johr)

Et Fröhjohr kütt janz höösch eran,
de Livverlingcher steije.
Un durch de Wolke af un an
et Bloe deit sich zeije.

För Stunde schingk et Sönnche lau,
wärm weed et en de Stroße.
Op eimol blös der Wind ärch rauh,
se springe huh,
sin fott em Nu,
die op de Parkbänk soße.

Sing Eier färv der Osterhas,
verstich se dann em jröne Jras.
Puute, loot in nit lang wade
un lauft me'm Körvje en der Jade!