Vereinsgründung „Fründe vun der Akademie för uns kölsche Sproch e. V."

Am 11.08.2006 fung Im Mediapark 7 et eeschte Treffe vun de Interessente an däm geplante Verein „Fründe vun der Akademie för uns kölsche Sproch e. V." statt. Em Vürfeld woodte sämpliche besherige Kursdeilnemmer vun dä Kölsch-Seminare, die zick 20 Johr stattfunge - wann se noch erreichbar wore - aangeschrevve, üvver de geplante Vereinsgründung en Kenntnis gesatz un zom gemeinsame Treffe am 11.08.2006 engelade. Et Intresse wor dermoße groß, dat mer em Huus ene größere Raum aanmeede moot för se all ungerbränge zo künne.

Wann se et Kölsch-Exame, däm vier Semester zosamme Liere vun Grammatik, Stadt-, Sproch- und Literaturgeschichte suwie kölschem Brauchtum vörusgegange wore, hatte, wore de Seminardeilnemmer off enttäusch, dat se aanschleeßend kein gemeinsame Basis mih hatte för die opgebaute Kontakte zo fläge.

Deswäge hät sich de Akademie för uns kölsche Sproch entschlosse, ene Verein zo gründe, dä en Plattform schaffe soll, wo sich Glichgesennte söke un finge künne. Dä Verein soll offe sin för all die, die Freud an der kölsche Sproch un Kultur han un Loss, sich aktiv enzobränge, alsu nit usschleeßlich för Seminaravsolvente.

Et Intresse vun dä Anwesende an der Metgliddschaff wor enorm groß un et kome direk en Rötsch Aanrägunge för Aktivitäte: Stadtführunge op Kölsch, e Theaterschmölzche met kölsche Texte, ene Chor met kölsche Leeder, Mundaatlesunge, Koche op Kölsch, Stammdesche, en eige Fastelovendssitzung, för nor e paar vun dä Vürschläg zo nenne. Dobei soll de Akademie för uns kölsche Sproch als „Daach" för dä Verein fungiere un Starthilfe gevve. Letzlich soll dä Verein ävver eigeständig agiere un „Aanlaufstell" sin för die noh ungerschiedliche Theme zoteete Schmölzcher, die sich regelmäßig treffe un aktiv jet op de Bein stelle.

Dä formale Ak vun der Vereinsgründung fung am 30.08.2006 statt.

Op http://www.fruende-akademie.de/ weedt Ehr üvver geplante un/oder ald en Aangriff genomme Aktivitäte informeet. Wä interesseet es, en däm ein ov ander Schmölzche metzowirke, fingk do de zogehürige Kontakdate. Wä eige Vürschläg enbränge mööch, kann ene Breef schecke an

Fründe vun der Akademie för uns kölsche Sproch e.V.
Postfach 45 04 24
50879 Köln

Wann Ehr Mitglidd weede wollt, scheckt en Mail an gronendahl( at )netcologne.de