För alle Seminardeilnemmer
Nohm aktuelle Stand fingen uns Seminare wie aangegovve statt.
För Deilnemmer an de Präsenz-Seminare gild de 2G - Regelung, geimf ov widder gesund. Gepröf weed dä Status durch de Seminarleitung am Aanfang vun enem Kurs. Ene Scan en der Luca ov Cov19-App deent de Seminardeilnemmer als Endrag för et individuelle Logboch un uns för et Nohverfolge. Et weeden Aanwesenheitsliste geführt. Et besteiht Maskeflich och am Setzplatz, wann ene 1,5 m Avstand nit engehalde weede kann.
De nächste Kurse fange Aanfang September aan, wann de Regele vun der Corona-Schutzverordnung, die dann gelde, et zolooße..
Hee künnt Ehr luure, wie et met der Aanmeldung läuf:
Flichkurse
Der eeschte Kurs för jeder heiß "Mer liere Kölsch".
Flichkurse muss mer besöke, wann mer et Kölsch-Exame maache well un esu kumme se em klassische Zweig hingerenander: "Mer liere Kölsch", "Stadtgeschichte", "Sprachgeschichte und Literaturkunde", "Brauchtum".
Zodäm beede mer ene rein sprochliche Zweig aan. Hee folg op "Mer liere Kölsch" "Rechtschreibung und Grammatik", Konversation" un "Schreibwerkstatt".
Onlinekurse
Mer beede Flichkurse als Onlinekurse aan vürrangig för Intressente, die nit en Kölle wonne. Mer muss ävver för de Kölsch-Examenspröfung en de Akademie kumme, wann mer ein maache well.
Themekurse
Se künne ohne Vürkenntnisse belaht weede. Et müsse em Augebleck mindestens 10 Lück deilnemme bei enem Themekurs.